جرعات التفكير الزايدة..
احساسك ان مفيش فايدة
والقهوة السادة المعتادة
والبنت اللى انت بتجرحها
كركبتك
كبتك
تنهيدك
والرعشة اللى ف طراطيف ايدك
مع اخر صورة بتمسحها
كلها تفاصيل شرحها بيطول
باين جواك مش شرط تقول
فيه حاجات بتبان ف عنيك ع طول
من غير ما تحاول تشرحها
سهران بتفكر فى الماضى
محتاج تاخد حقنة نسيان
نص الكوباية عشان فاضي
خلاك متبصش للمليان
ف بقيت بهتان..
انسان بيمثل دور انسان
مشكلتك رغم الناس حواليك
مع ذلك ع طول وحداني
بتراهن ع الناس ف بتخسر
وبتخسر
فتراهن تانى
احساس وطلعلك بني ادم
لكنك على هيئة ذكرى
يوميا بيعاهد نفسة
انه هيتغير من بكره!
افهم علشان ترتاح يا عبيط
كله ترانزيت
كلنا في حياة بعضنا فترات
ولذلك مش مستاهلة عياط
وياريت تفهم لو جيت للنور
هتقابل حد تحبه بجد
وان كنت مودع حد عزيز
فمصير النور يبعتلك حد