Btc roulette قصيدة " التلج داب " للشاعر محمد ابراهيم كلمات

القائمة الرئيسية

الصفحات

قصيدة " التلج داب " للشاعر محمد ابراهيم كلمات

التلج داب
معرفش ليه..
كل الاماكن ضيقة الليله
كل المدن مؤلمة..
ومضلمة وبارده
وانا ايه في ايدي.. غير اديكى انتى
مدي ايديكي فى روحي وازرعي وردة
انا قلبي تاة ..
عيل في مولد ضحكتك
سارح.. عمال بقابل بكرة في امبارح
طيفك مشي..
فلقتنى ماشي وراه
درويش بقول (الله)
الله جميل..
وانتى الجمال.. سبحانه
خلي عنيكى مفتاح الحياة
اول ما بس ببصلك .. بلقينى طرت لفوق اوى
عند النجوم.. فوق فى السما
يمكن مطولتهاش انما .. اشعر بقلبي بينتشي
انا قلبى عندك "فتشي"
هتلاقى نفسك ساكنه
فيا بوضع يد..
م المستحيل
لو جيتى قلبي تلاقى غيرك اي حد
من المستحيل
لو تلمسينى افضل كده
التلج داب
والحرب خلصت من زمان
حتي الزمن
 غير حاجات في حاجات كتير
الا انتى حلوة وطيبة وقلبك كبير
معرفش ليه الدنيا ربطانا بضمير
وكأنها حالفه اننا منسيبش بعض
معرفش وعد الحر دين
وان كان دا دين؟! اعتبرة وعد
مقصدش حاجة انا بس شوفت من الحياة
نهايات حزينة
لناس كتير دفعوا التمن
اصل الزمن علمنى
اخاف اوى من الزمن
وانا جيت خلاص ورميت بياضي مقدما
لو عايزة عمرى
خلاص خدينى من غير شروط
لكن ياريت جنبك يفوت ..وتكوني جمبي
وباب علينا بيتقفل
ونعيش لاخر عمر بعض بنحتفل
ونشوف لاول مره حلو بيكتمل
من غير ما يجى فراقنا يسبق حلمنا
او يجي بكره فنصحى من حلم احنا فيه
وانا اهو بقيت خايف اوي .. معرفش ليه

تعليقات