لو زي ما بتقول حبيتها
حسسها انك تنفع بيتها
الحب ده كلمة بدرجة "عقد"
محتاجه ل راجل يثبتها ..
البنت دى كائن مش مفهوم
وكأنك بتلف متاهة
محتاجة لصاحب يبقى حبيب
وحبيب يعرف يتبناها
مش شرط يكون فارس احلام
ولا حتى امير بحصان طاير
ولا شخص يشوف فيها الطفلة
المجنونة الهبلة ام ضفاير
محتاجه لشخص يطلعها
من ضلمة خوفها لاى نهار
البنت بجد اما بتختار
بتدور على شخص يصونها
على اخر واحد فى العالم
يفهمها بدون ماتقول فى كلام
يبهتوا على بعض مع الايام
فتحس ان الاتنين واحد
شكلا موضوعا احساسا
البنت دى محتاجة اساسا
للشخص اللى يكون دكتورها
ويرجع ضحكتها ونورها
ويهاود وقت ما بتعاند
ويحاول يسمع ويفوت
فتفتح وكأنها وردة
وتحس انها فجأه احلوت
لو فعلا حبيتها ناقشها
وان زعلت منك فرفشها
حبها بطريقة تعيشها
وبلاش الحب اللى يموت !
قصيدة من ديوان لما كنا