عايش وخلاص
زعلان من شكلك ليه دلوقت ؟!..
ايه اللى اتغير فيك بالوقت..
دى ملامحك ولا مرايتك دى..
كدبت على عينك وقت ما شُفت
واذا كنت صحيح ما اتغيرتش ..
ليه لما لمحت ملامحك خُفت..
ليه قلبك فجأه بدأ يسود..
مابقتش تآمن حتى لحد..
وهزار الدنيا بيقلب جد ..
كل ما بتبص على مرآيه..
ليه حظك كشر فجأه ف ضيعت..
ولقيت نفسك حبيت ودعت..
وطلعت لفوق جدا و وقعت..
مكسور وكأنك كوباية..
تليفونك ليه مبقاش بيرن؟!..
كان عندك صاحب فين هو؟!
بقى عندك كام سنة من جوة؟!
وكبرت ازاى بمرور الوقت
قلبك مجرور على نقالة
عجزت كتير .. من غير تفسير
كُتر التفكير .. خلاك آله
مش عارف حتى تحس بشئ
مش قادر تعرف ايه الفرق
بين طعم الضحك وطعم الضيق
وكإنك نايم بس مانامش
وكإنك فايق مش بيفوق
تفتكر الوضع هيتغير
لما انا وانت هنتقابل فوق؟!
ف السما لو تطلع تلقى هناك
ناس كانوا عايين قبلك بسنين
ناس ليهم ياما زمان اشتقت؟!
انا عايز اطلع فوق دلوقت
صدقنى فى يوم كلنا طالعين !!
قضيت الليل بتعد حاجات..
وتسيب الناس فى كلام اوقات
وتسيب الناس فى كلام على الشات
يخلص موضوع تفتح موضوع
وحرقت كلام لازم يتشال
وركنت كلام لازم يتقال
بقى وضع طبيعى يكون الحال
من بعد دا كله تكون موجوع!
ولان دا جين فى البنى آدمين
وعشان كلنا من نفس النوع
دى الحالة العامة لربع الناس
والربع التانى بيتفرج..
والربع التالت بيهرج
والربع الرابع على عادته
عايش وخلاص !!
قصيدة من ديوان لما كنا ..