أغنيه فرنسيه حزينه
مش كل مكان في الكون هيساع
ولا كل قلوب الناس تنفع
تبقالك أرض عشان تدخل تزرع وردة
الوقت بطيء
دقات الساعة ساعات بتكون سكاكين باردة
تقتل على مهل
الليل مش سهل
الليل بيفوت قطر مهدي..
فيه حاجات مش دايما بتعدي
فيه حاجات جوانا بتتبقى
وتسيبنا مابين.. أيوه ولأه
أرجعلك؟!.. لأ..
أرجعلك.. آه
وكأني بحبك بالإكراه
مش عارف خايف ولا خلاص
مش عايز أرجع من تاني
أنا كل ما برجعلك بندم
مع ذلك في البعد بعاني
في جرح في قلبي ملوش عنوان
غير إنك ماشية وسيباني
والدنيا بتوجع في غيابك
القصة بقت أكبر بكتير
من واحد سبتيه أو سابك
القصة بقت ان أنا عايش
لكن مش عايش بالمعنی
كان نفسي أحس بإن الكون
قادر يتحمل أوجاعنا
أو حتى أحس ان الدنيا
مش قاسية علينا ومش جاحدة
وان الأيام مش هتفرق
بين واحد لو حابب واحدة
وان أنا مش هفضل طول عمري
متعلق بین حزني وحيرتي
وأتنقل من وحدة لوحدة
وان أنا مش هقضي حياتي تعيس
محبوس في حنيني لناس راحوا
الواحد من كتر جراحته
مبقاش يعد ولا بيزعل
ولا يشغل باله بمين مجروح أو مين جارح
والله بقالي كتير عایش
مش عارف بكره من امبارح
أيام بتعدي مبحسبهاش
وأنا لسه في آخر طرابيزه
قاعد متخدر وبحاول
أخرج من الوضع اللي أنا فيه
الراجل مننا لو يزعل
كل اللي في إيده انه بيقعد
على أي كافيه
بيجي الجرسون
وأنا إيدي تشاور.. هات قهوة
أشرب منساش.. أشرب أتذكر.. وأفكر
والجو العام عادي وهادي
بس أنا جوايا صراع أكبر
من أزمة روسيا وأمريكا
تقتحم المشهد مزيكا..
اغنيه فرنسية حزينة.. مفهمتش کلیاتها لكني
حسيت وأنا قاعد بسمعها
انك بتضيعي خلاص مني
وان أنا بشبه تشرين في بكاه
وان أنا مش قادرع النسيان
پسمع وفي إيدي کتاب بقراه
ويضيع وقتي مع الأحزان
ويكلم نفسي وبتأمل
في ماضينا وفي الوضع الحالي
وأنا كل ما أقول مش هفتكرك
بلاقيكي أوام تيجي في بالي
والحق أن أنا فاكرك جدا
حبيتك وكرهتك جدا
مش قادر أقول عنك أبدا
موضوع انتهى بالنسبالي