أنا بنته
أنا اللي بنظرة طمنته
ولو يقبل هكون بيته
ولو يدبل ف انا جنیه
أنا اللي أن شافني يرجع طفل
ويشبط فيا مايسبنيش
يغير يقفل عليا بقفل
عشان الناس دي ماتشوفنيش
لأول مرة أبطل عند..
وأسيب نفسي شراع هواه
وأحس بإني خايفة عليه
كإني مخلفاه ونسياه
بيتعبني وبيسيبني
و برجع أحنله وأناديه
بعامله بجد زي ابني
وعمري ما بعرف أقسى عليه
وهي الأم لو تقسى فيوم
ع الابن تعمل إيه؟!
آخرها تخاصمه يوم واحد
يعدي اليوم وترجعله
لأن زعلها لو هيهون
عليه مايهونلهاش زعله
أتاني وهي مش قادرة
تصلح فيه ولا تسيبه
وغصبا عن عيون روحها
بقت قابلاه على عيبه
بقت شايفة الحياة بعنيه
وواقفة وراه وساندة عليه
ولو سألوها عاجبك ليه؟!
تقول «هو انتوا مالكوا انتوا »
وايه بس اللي دخلكم
ما بين واحد وبين بنته !