Btc roulette وائل غنيم يكتب: من قواعد اصلاح النفس وتهذيبها

القائمة الرئيسية

الصفحات

وائل غنيم يكتب: من قواعد اصلاح النفس وتهذيبها

من قواعد إصلاح النفس وتهذيبها: 

- اعمل الغلط واعترف بيه قصاد نفسك قبل الآخرين وعوّد نفسك تقلل من تقييمك لأسباب وقوعك في الغلط وتركز في البحث عن طريقة لإصلاح الغلط وتوابعه.

- الغضب سلاح مؤذي وفعاليته دائما بتسبب للإنسان مشاكل في حياته مع أقرب الناس ليه قبل الغريب عنه. الغاضب بيجرح في مشاعر غيره بالحق والباطل وعشان كده ضروري نتعلم إن مساحات الغضب مينفعش نروح ليها اختيارا ولما نلاقي نفسنا في مساحة غضب نحاول نبعد شوية ونهدّي نفسنا وبعدين نرجع نحاول نفكر في الموضوع اللي مخلينا غضبانين عن نفسنا.

- الشجاعة مش في التعبير عن القوة بالكلام، لكن الشجاعة بتظهر في المواقف اللي بتحتاج شجاعة ومن تعريف المواقف دي إنها مواقف نادرة ومش متكررة كتير في حياة البني آدم إلا لو كان هو شجاع جدا. فحاول تقلل من إظهار قوتك وشجاعتك بالكلام مع الناس عشان تثبتلهم إنك قوي وشجاع. 

- الصراحة مع نفسك وغيرك مطلوبة بس برضه مطلوب إن الإنسان من جواه يقدر إن مش كل الناس بتفكر بنفس الطريقة وأحيانا صراحتنا بتجرح غيرنا من غير ما بنقصد وخاصة لو لقيناهم بيتضايقوا من صراحتنا. الصراحة لازم تكون متعمّرة بالدبلوماسية اللي فيها مراعاة مشاعر الآخرين وأفكارهم وظروفهم.

- النجاح الحقيقي في الدنيا هو النجاح في اختبار الأخلاق. كل واحد فينا مهما كان صغير أو كبير بيتعرض لاختبارات كتير في حياته وطريقتنا في التعامل مع الاختبارات دي هو اللي بيحدد طريقنا. النجاح جزء منه الفلوس والمناصب والعقارات وده بديهي ولكن اللي يعمل ده وهو محافظ على أخلاقه وبيسعى يفيد غيره زي ما بيفيد نفسه هو اللي بيكون ناجح لأنه بيساعد في تعمير الأرض.

- أخلاقنا زي النبات محتاجة اهتمام بالبذرة ورعاية واهتمام وتطعيم بالعلم والفكر وقصص اللي سبقونا وتميزوا في أخلاقهم عن غيرهم في أحداث كبيرة زي الرسل والأنبياء عليهم السلام وزي الشخصيات التاريخية الكبيرة اللي فضل الناس يتناقوا قصصهم عبر التاريخ. وكمان الأخلاق هنشوفها في ناس كتير حوالينا مهما كانت درجة وعيهم بسيطة. لأن الأخلاق غذائها الأساسي خارجنا بيكون من الأهل ودواير الأصدقاء والمعارف.

- متفكّرش كتير في مصائر غيرك ومتتعلقش بحد لدرجة تضعفك قصاد نفسك ودع الخلق للخالق بقدر ما تستطيع. لو عايز تحمي نفسك من أحكام غيرك عليك حاول بينك وبين نفسك تقلل من أحكامك عليهم حتى لو هما مستمرين وبكره هتشوف نتيجة ده في نفسك وفي نفوسهم. 

- ركز في اللي عندك مش اللي راح منك أو ممكن يبقى معاك. اهتم باللي معاك وكن ممتن بإنه لسه معاك عشان ميروحش منك هو كمان. لأن يمكن ده كان سبب إن راح منك اللي قبله. النعم بتختارنا مش بنختارها.

- متزعلش لو وقعت ومش عارف تقوم ومتشغلش نفسك بإنك وقعت أكتر ما تشغل نفسك بإن روحك لسه بتنبض بالحياة وقادر تورّي نفسك قبل غيرك إنك تقدر تقف. فيه ناس كتير في الطريق هتساعدك اقبل مساعدتهم وفي ناس كتير مش هتشوفك تفهّم ظروفهم وفي ناس كتير هتدعيلك فادعيلهم.

وائل غنيم
كاليفورنيا
٢٩ يناير ٢٠٢٢

تعليقات