Btc roulette نصائح هامة لجميع طلاب الثانوية العامة قبل بدء مارثون الامتحانات

القائمة الرئيسية

الصفحات

نصائح هامة لجميع طلاب الثانوية العامة قبل بدء مارثون الامتحانات

مهم جداً جداً :
جميع طلاب الثانوية العامة إليكم مجموعة نصائح هامة :

تبدأ بإذن الله أمتحانات الثانويه العامه يوم الاثنين غدا الموافق 20/6/2022 ونناشد الساده أولياء الأمور عدم التواجد أمام اللجان وبوابات المدارس كل ده بيعيق عمل القائمين علي التنظيم وبيوتر الطلبه .  

◾هتدخل اللجنة تستلم كراس أسئلة وورقة إجابة بابل شيت.

◾ كل فصل (لجنة) هيكون فيه أربع نماذج أسئلة للامتحان.

◾ الأسئلة واحدة في النماذج الأربعة لكن ترتيبها متغير بينك وبين زميلك.

◾ترتيب الإجابات هيكون مختلف بينك وبين زميلك يعني ترتيب الأسئة مختلف وترتيب الإجابات برضو مختلف.

◾ هتلاقي رقم كود على ورقة الأسئلة اكتبه بالنص في ورقة البابل شيت من فوق.

◾ لازم تكتب رقم الكود علشان يبقى نموذج الأسئلة اللي معاك مطابق للبابل شيت بتاعك.

◾لازم يكون معاك قلم رصاص وقلم جاف ومسطرة وأستيكة (مساحة) وبراية.

◾ استخدم المسطرة في إنك تمشي براحة في البابل شيت وتحط الإجابة قصاد نفس رقم السؤال لأن عينك ممكن تروح على السؤال اللي بعده وتعلم عليه من غير ما تاخد بالك.. هنا أهمية المسطرة.
◾ هتستخدم القلم الرصاص في تظليل رقم الإجابة اللي انت شاكك فيها، وفي الآخر تبقى ترجع لها علشان تظللها بالقلم الجاف لما تتأكد منها.
◾القلم الجاف هو الأساس في التظليل.. واتأكد إنك ظللت الدايرة كلها.

◾ لو ظللت إجابة بالجاف وعايز تغيرها.. اكتب عليها علامة (إكس).. وبعدها اختار الإجابة الصح.

◾ لو عملت (إكس) على الإجابة الغلط واخترت إجابة صح غيرها.. متقلقش.. هنا جهاز التصحيح الإلكتروني مش هيقول إنك اخترت إجابتين.. هنا هو هيصحح الدايرة اللي مش عليها إكس.

◾ لو انت عملت إكس على الإجابة اللي انت لغيتها، وظللت دايرة تانية بس مش بشكل واضح، متخفش، هنا الجهاز مش هيصحح السؤال ده وهيصدر إشارة حمراء إن فيه سؤال لم يتم تصحيحه.. بعدها هيكون تصحيحه بالعين المجردة (تصحيح يدوي يعني)، يعني لا تقلق هتاخد درجة السؤال، وده حصل السنة اللي فاتت، فبلاش تكون قلقان.

◾السؤال اللي تحس إنك هتاخد وقت فيه ومش عارف توصل لإجابة صحيحة من الاختيارات.. سيبه وروح للي بعده، علشان الوقت، وبعدين ابقى ارجع له تاني لما تخلص إجابة باقي الأسئلة.

◾ بلاش تظلل دايرتين في ورقة البابل شيت لنفس السؤال وتقول هما ياخدوا الإجابة الصح.. كده هتاخد صفر على السؤال ده.

◾ لازم تسلم ورقة الأسئلة وورقة البابل شيت للمراقبين.. علشان زي ما قلت لك هيطابقوا نموذج الأسئلة بتاعك بالبابل شيت، لأن النماذج مختلفة داخل اللجنة الواحدة، وهنا مش هيكون فيه مجال إن طالب تتبدل إجابته أو النموذج بتاعه مع طالب تاني.. اطمن.

◾ورقة البابل شيت هتبقى من صفحة واحدة.. يعني هتبقى عارف انت جاوبت على ايه وسايب إيه مش هتقعد تقلب في ورقة الإجابة.. لأنها ورقة واحدة زي ما قلت لك.

◾ متنساش تكتب اسم ورقم جلوس ولجنتك على ورقة الأسئلة وتكتب اسم ورقم جلوسك ولجنتك ورقم الكود في ورقة البابل شيت.

◾ لا تحاول انك تغش ولا تطلب إجابة من الطالب اللي قدامك ولا اللي وراك.. أسئلتهم ترتيبها مختلف عن ترتيب أسئلتك.. وترتيب الاختيارات عندهم مختلف عن ترتيب الإجابات عندك.. ركز في حالك ومضيعش وقت في حاجة هتضرك مش هتفيدك. 

◾ لو اتمسكت بموبايل حتى لو مقفول، هتتحسب عليك محاولة غش وهتسقط في المادة.. سيب موبايلك مع المراقب.

#بالتوفيق لجميع ابنائنا الطلاب .

تعليقات